15 апрелдән 19-на тиклем Өфө, Стәрлетамаҡ һәм Салауат ҡалаларында «Өфөнөң йәш виртуоздары» исемле фестиваль үтәсәк. Был сарала һәләтле музыканттар — Өфөләге урта махсус музыка колледжы уҡыусылары, Мәскәү һәм Санкт-Петербург консерваториялары студенттары, Владимир Спиваковтың Халыҡ-ара хәйриә фонды стипендиаттары ҡатнаша.
Йәш башҡарыусылар ҡатнашлығында фестиваль үткәреү тәҡдиме менән Владимир Спиваковтың Башҡортостандағы фонды сығыш яһаны. Ошо сарала төбәк халҡы ҡасандыр Өфөнән Мәскәүгә, Санкт-Петербургка, Европаға уҡырға киткән һоҡланғыс музыканттарыбыҙ хаҡында ла белә аласаҡ.
Концерттарҙан тыш, йәш музыканттар, Мәскәү һәм Санкт-Петербург консерваториялары студенттары Өфө, Стәрлетамаҡ һәм Салауат ҡалаларының музыка мәктәптәрендә оҫталыҡ дәрестәре үткәрәсәк. Программа сиктәрендә шулай уҡ, художество мәктәптәрендә уҡыусыларҙың һынлы сәнғәт күргәҙмәләрен ойоштороу ҡаралған.