Заһир Исмәғилев исемендәге Өфө дәүләт сәнғәт академияһы атамаһын үҙгәртте, хәҙер ул ошо уҡ исемдәге сәнғәт институты тип йөрөтөләсәк. Рәсәй Мәҙәниәт министрлығында ошо турала бойороҡҡа ҡул ҡуйылған. Уҡыу йортонан аңлатыуҙарынса, исемде алмаштырыу ВУЗ-дың дәрәжәһен кәметмәй. Мәғариф тураһындағы законда Юғары уҡыу йорттары төрҙәре тигән төшөнсә күрһәтелмәгән, йәғни 2013 йылдың 1 сентябренән алып "академия", "университет" һәм "институт" араһында айырма юҡ. Башҡротостандың төп ижади уҡыу йорто 2003 йылдан алып академия тип йөрөтөлдө. Уны Заһир Исмәғилев исемендәге сәнғәт институты тип үҙгәртеү тураһында ҡарар уҙған йылда ВУЗ хеҙмәткәрҙәре йыйылышында ҡабул ителде.

"Юлдаш" радиоһы сайтынан