Владимир Спиваковтың икенсе халыҡ-ара скрипкасылар конкурсы еңеүсеһе уникаль скрипка менән бүләкләнәсәк, инструменттың яҡынса хаҡы 9 миллион һумдан ашыу.

21 сентябрҙә "Башҡортостан" дәүләт концерт залындағы гала-концертта еңеүсегә 1912 йылда итальян оҫтаһы Риккардо Антониацци яһаған уйын ҡоралы тапшырыласаҡ.

Республикала маэстроның тыуған ҡалаһында ике йыл элек ойошторолған скрипкасылар конкурсына әҙерлек әүҙем барҙы. Кисә, 17 сентябрҙә бәйгеселәр йәрәбә һалыуҙа ҡатнашты. Һайлап алыу турын 16-26 йәшлек Рәсәй, Япония, Испания, Көньяҡ Корея, Израиль һәм Эстониянан 12 башҡарыусы үткән.  

Конкурсанттарҙың сығышын күренекле скрипкасы Михаил Копельман етәкселегендәге халыҡ-ара жюри һәм Владимир Спиваков баһалаясаҡ.