2-4 декабрҙә Башҡортостандың баш ҡалаһында тәүге тапҡыр Миләүшә Мортазина призына Беренсе Бөтә Рәсәй вокалсылар конкурсы уҙғарыла. Конкурсты легендар педагог ярты быуаттан ашыу эшләгән Заһир Исмәғилев исемендәге Өфө дәүләт сәнғәт институты ойоштора.
Сара 2 декабрҙә иртәнге сәғәт 10-да Шаляпин исемендәге концерт залында асыла. Ҡатнашыусылар өсөн йәрәбә һалына. Конкурс тыңлауҙары 2 һәм 3 декабрҙә дауам итә. 4 декабрҙә сәғәт 12-лә еңеүселәрҙе бүләкләү тантанаһы һәм гала-концерт була.
Өфө дәүләт сәнғәт институтынан хәбәр итеүҙәренсә, конкурсҡа республикабыҙ, шулай уҡ Екатеринбург, Ҡазан, Магнитогорск, Силәбе, Пермь башҡарыусыларынан 100-гә яҡын ғариза килгән. Улар — мәҙәниәт һәм сәнғәт колледждарының йыр бүлектәре, «Академик йырлау» йүнәлеше буйынса музыка юғары уҡыу йорттары студенттары. Конкурс йәш төркөмдәре буйынса «Яңғыҙ йырлау» номинацияһында уҙғарыла.