15-16 октябрҙә Нефтекама дәүләт филармонияһында шаулап-гөрләп «Ҡайт ауаз» татар эстрада төркөмөнөң “Алтын көҙ моңдары”, тип исҽмләнгән концерттары үтте.
Татар эстрада төркөмөнөң артистары: БР-ҙың атҡаҙанған артисы Р.Ғәбделйәнов, С.Ғәфүрйәнова, Ф.Сәхибгәрәев, Р.Йәнбирҙина, А.Әмиров, А.Шамукова, Н.Ниғәмәев, Р.Исламова килгән тамашасыға үҙҙәренең иң матур, дәртле, күңелле йырҙарын бүләк иттеләр. Сағыу тамашала: ҡурайҙа - И.Исҡужин, балалайкала - И.Гәрәев, баянда - И.Ғарипов өҙҙөрөп уйнанылар.
Нефтекама дәүләт филармонияһының йөҙөк ҡашы булған «Түңгәүер» бейеү ансамбле һәр ваҡыттағыса тейешле кимәлдә, күҙ яуын алып торған кейемдәр менән матур сығыш яһаны. «Ҡайт ауаз» төркөмө артисткаһы С.Ғәфүрйәнова концерт программаһын көҙ темаһына бәйләп, йәнле итеп алып барҙы.
Бай йөкмәткеле, сағыу концерт программаһы тамашасыларҙың йөрәктәренә хуш килде. Нефтекама халҡы “Ҡайт ауаз” төркөмөнөң һәр артисына көслө алҡыштар бүләк итеп, саранан бик ҡәнәғәт ҡалды.