Мәләүез районының Көнгәк тауы итәгендә «Көнгәктән Парижға тиклем» тигән халыҡ байрамы уҙҙы. Сара Рус армияһының 1812 йылғы һуғышта еңеүенә 210 йыл тулыуға һәм 1813-1814 йылдарҙа Европаны Наполеон хакимлығынан азат итеү буйынса Рәсәй армияһының сит ил походтарына арналған «Ата-бабаларыбыҙҙың иҫтәлегенә лайыҡ булайыҡ!» мәҙәни-тарихи фестивале сиктәрендә үткәрелде.

Байрам 1812-1814 йылдарҙа Наполеон менән һуғышта ҡатнашҡан яугирҙәргә бағышланған мемориаль плитаға сәскәләр һалыуҙан башланды. Ул 2012 йылда 1812 йылғы Ватан һуғышында еңеүҙең 200 йыллығына ҡарата асылған. Икенсе плита Көнгәк тауының үҙенә ҡуйылған.

Башҡорт атлыларын 1812 йылғы Ватан һуғышына оҙатыуҙы һәм уларҙы еңеү менән ҡайтыуын сәхнәләштереү байрамдың иң тулҡынландырғыс һәм сағыу өлөшө булды. Ике быуаттан ашыу ваҡыт үткәс, Көнгәк тауы йәнә бер тапҡыр шул тарихи ваҡиғаларҙың шаһитына әүрелгәндәй булды. «Парижға ла еттек беҙ» театрлаштырылған тамашала тарихи костюмдар файҙаланылды, башҡорт йолалары күрһәтелде.