Бөгөн, 3 ноябрь көнө, Халыҡлар берҙәмлеге көнө алдынан Рәсәйҙең барлыҡ төбәктәрендә «ҙур этнографик диктант» халыҡ-ара  акция утте. БДУ-ның Гуманитар корпусында  икенсе тапҡыр Өфө халҡы үҙенең этнографик белемен тикшерә алды. Бөгөн"Ҙур этнографик диктант" илебеҙҙең барлыҡ төбәктәрендә лә үтте.

Ойоштороусылар хәбәр итеүенсә, быйыл  "Ҙур этнографик диктант" сараһы халыҡ-ара статусҡа эйә булды, шунлыҡтан үҙҙәренең белемдәрен рәсәйлеләр генә түгел, ә сит илдә йәшәүсе ватандаштарыбыҙ ҙа тикшерә алды.

"Ҙур этнографик диктант"та теләгән һәр кем ҡатнаша ала ине. Тест һорауҙары теге йәки был миләттең йола, ғөрөф-ғәҙәттәре, аш-һыуы, халыҡтар араһында дуҫлыҡ һәм башҡа темаларҙы үҙ эсенә алған. Мәҫәлән, диктант өсөн яуаплы ведомство - Милләттәр эштәре буйынса федераль агентлыҡ ҙур тест өсөн Башҡортостандан 10 һорау алған.

Сараны ойоштороусылар: Удмурт Республикаһының милли сәйәсәт министрлығы һәм Милләт эштәре буйынса федераль агентлыҡ, Башҡортостан Республикаһының Мәҙәниәт министрлығы һәм БР Халыҡтар дуҫлығы йорто.

Диктант һөҙөмтәләре 12 декабрҙә - Рәсәй Конституцияһы көнөндә билдәле буласаҡ.