Бөгөн, 26 сентябрь Өфөнөң "Родина" кинотеатрында “Салауат юлдары буйлап” тип аталған документаль фильмының премьераһы уҙа.
Фильм “Салауат юлдары буйлап” тигән киноэкспедиция барышында төшөрөлдө. Ул милли батырыбыҙҙың тыуған төйәге – Салауат районында башланды һәм артабан өс аҙна Рәсәйҙең һәм Эстонияның 12 ҡалаһында дауам итте.
Йәй башында Башҡортостан Кинематографистар союзы башҡорт киноһы тарихында беренсе тапҡыр Президент гранты фондының федераль грантына лайыҡ булғандан һуң, кино сәнғәте ижадсыларынан бер төркөм үҙенсәлекле сәфәр ҡылып ҡайтты.
Сәфәрҙең ижад емеше булараҡ, көҙ киноэкспедиция, Салауаттың юлдары, Рогервик ҡәлғәһендә үткән йылдары хаҡында документаль фильмдың ҙур экранға сығыуы көтөлә. Кинотаҫманың режиссеры – Таңсулпан Бураҡаева.
Киноэкспедиция ойоштороу идеяһы Фәрит Ғәбитовта яралды, һәм ул миңә мөрәжәғәт итте. Башта фильмды документаль жанрҙа ғына төшөрөргә йыйынһаҡ та, мин нәфис кино төшөрөү буйынса режиссер булғас, сюжет һыҙығына үҙгәрештәр индерелде, ти Таңсулпан Бураҡаева.
Грантҡа йәлеп ителгән 57 ойошма араһында беҙ тәүге өс яҡшы проект исемлегенә индек. Салауат – күп милләтле Башҡортостан халҡының символы. Уға бәйле проектҡа Рәсәй кимәлендә ҙурлап грант бирелеүе илебеҙ киңлектәрендә Салауат исеменең билдәлелеге хаҡында һөйләй, тине Фәрит Ғәбитов.