Кавказ тауҙарының береһендә "Мостай Кәрим түбәһе" барлыҡҡа килде. Башҡортостандың халыҡ шағирының исеме Ҡабарҙы-Балҡар республикаһында 3550 метр бейеклектә мәңгеләштерелде.

Рус география йәмғиәтенең төбәк бүлексәһе ағзалары сит төбәктә урынлашҡан бейек тауға күтәрелеп, түбәһенә иҫтәлекле таҡта ҡағыуҙа ҡатнашты. Ҡабарҙы-Балҡар республикаһында әҙиптең яҡын дуҫы, билдәле шағир Ҡайсын Кулиев йәшәгән. Һуңғыһының исемен йөрөткән бейеклек күптән бар, билдәле булыуынса, ике тау ҙа бер-береһенә яҡын урынлашҡан. Мостай Кәрим исемен мәңгеләштереү тәҡдиме урындағы хөкүмәт тарафынан да раҫланған.

Экспедицияла ҡатнашыусылар Мостай Кәрим түбәһенә 18 сәғәт күтәрелә. Оло юлда Башҡортостан вәкилдәрен Ҡабарҙы-Балҡар республикаһының тәжрибәле альпинистары, Ғәҙәттән тыш хәлдәр министрлығының ҡотҡарыусылары оҙатып бара.

Ҡаршылыҡтар күп була - яҡташтарыбыҙға тау йылғалары һәм боҙлоҡтары аша үтергә тура килә, шулай уҡ улар томанда текә тау бите буйлап та атлайҙар. Рус география йәмғиәтенең төбәк бүлексәһе ағзалары Ҡайсын Кулиевтың яҡындары һәм урындағы Яҙыусылар Союзы вәкилдәре менән дә осрашып, ике әҙиптең тормош һәм ижад юлы хаҡында фекер алышҡан.

Ҡабарҙы-Балҡар халҡының шағиры Ҡайсын Кулиев исемен йөрөткән тау түбәһе бар. Ике шағир тормошта ла дуҫ булған. Хәҙер йәнәш торған тауҙар ҙа улар исемен йөрөтә.

Ҡайсын Кулиев—  Ҡабарҙы-Балҡар АССР-ының халыҡ шағиры. Ҡайсын Кулиевтың шиғырҙарын башҡорт шағирҙары Назар Нәжми, Мостай Кәрим, Сафуан Әлибай һәм Шәриф Бикҡол тарафынан тәржемә ителгән. 1971 йылда уның «Яралы таш» исемле шиғырҙар йыйынтығы Өфөлә башҡорт телендә донъя күрҙе. Уның тормошо һәм ижады тураһында Мостай Кәрим «Шағир донъяһы», Назар Нәжми «Таш һәм йөрәк» исемле мәҡәләләр яҙған.

Мостай  Кәримдең  әҫәрҙәре  тиҫтәләгән  телгә  тәржемә  ителгән.   Башҡортостанды  ғына  түгел, унан  ситтә  лә яратып  уҡыйҙар, ихтирам  итәләр. Ҡайсын  Кулиев: “Әгәр  мин Башҡортостан  тураһында  Мостай  Кәримдең  китаптарынан  башҡа  китап  уҡымаһам, Мостайҙан  башҡа  бер  башҡортто  ла  күрмәгән  хәлдә лә, мин  Башҡортостанды һәм уның халҡын  беләм,  тип  иҫәпләр  инем…”, - тип  яҙа.

Ҡайсын Кулиев тураһында яҙғанда йыш ҡына: «Беҙ Ҡайсын менән уның тыуған ерҙәренән тауҙар аша үткәндә…» — тип башлап китеүсәндәр. Дөрөҫ, Кавказдың экзотикаһы ғүмер-ғүмергә кешеләрҙең күңелен үҙенә тартҡан, ҡайһы бер шағирҙарҙы бөйөк шағир итеүҙә лә уның ҙур роль уйнауы сер түгел, ләкин ул ваҡытта күптәр Кавказға ҡунаҡ булып бармағандар. Бына хәҙер Ҡайсындың тыуған ерендә, уның йортонда булмаған дуҫтары юҡ шикелле. Мәҫәлән, беҙҙең Мостай Кәрим бер шиғырын: «Чегем шарлауығын бүләк итте миңә Ҡайсын», — тип башлап китә. Минеңсә, был шиғыр Мостай Кәрим тарфынан уйлап сығарылмаған, дөрөҫөрәге, уйлап табылмаған, ә тормош үҙе биргән шиғыр, Ҡайсын бүләк иткән шиғыр. «Чегем шарлауығын бүләк итте миңә Ҡайсын…» Ҡалай ул Ҡайсындың натураһын, уның күңелен, уның бөтә барлығын кәүҙәләндерә! Тормошта ла, шиғриәттә лә йомарт күңелле шул ул” тип яҙып ҡалдырған Назар Нәжми.

Барлыҡ ғүмерен Башҡортостанға арнаған шағир һәм бөйөк шәхес, тарих битенән юйылмаҫ әҫәрҙәр ҡалдырған ижадсы исемен мәңгеләштереп Чегем тауҙарының бер түбәһенә Мостай Кәрим исеме бирелеүе үтә лә ҡыуаныслы хәбәр.