Мәжит Ғафури исемендәге Башҡорт академия драма театры актеры, Башҡортостандың халыҡ артисы Ирек Булатовтың юбилей бенефисы үтте.

Шатлыҡтарҙы бүлешкән һайын улар арта бара, тиҙәр. Ирек Әлмир улы ла юбилей кисәһен үҙенең коллегалары, яҡташтары, яҡындары, дуҫтары һәм тамашасылары менән бергә үткәрҙе.

Спектакль алдынан юбилярҙы мәртәбәле ҡунаҡтар - Башҡортостан Республикаһының мәҙәниәт министры урынбаҫары Ринат Ғайсин, Күгәрсен районы хакимиәте башлығы урынбаҫары Артур Әбдрәхимов, Бөтә донъя башҡорттары ҡоролтайының Башҡарма комитеты рәйесе урынбаҫары Сынтимер Баязитов, Театр эшмәкәрҙәре союзының идара ағзаһы, Рәсәйҙең атҡаҙанған, Башҡортостандың халыҡ артисы Алмас Әмиров, Өфө ҡалаһындә йәшәүсе “Оло Эйек” һәм “Кесе Эйек” яҡташтар ойошмаһы ағзалары -Тимербулат Хоҙайғолов һәм Нурия Кинйәбаева ҡотланылар. Юбилярҙың коллегалары, ижадташ дуҫтары - Мостай Кәрим исемендәге Милли йәштәр театрынан Гөлшат Ғайсина, Альбина Кашанова, Гөлбинә Сафуанова һәм “Нур” татар дәүләт театрынан - Рушат Мөҙәрисов тә юбилярға матур теләктәрен еткерҙеләр.

Ирек Әлмир улы өсөн иң ҙур ҡыуаныс - уның әсәһе Әнисә Абдулла ҡыҙының тамаша залында булыуы, әлбиттә - үҙенең ғүмер байрамында иң матур гөлләмәне юбиляр әсәһенә бүләк итте. Театр директоры Иршат Фәйзуллин, баш режиссёр Айрат Абушахманов һәм юбилярҙың туған коллективы кисәнең ҡотлауҙар өлөшөн йомғаҡланы. Байрамдың икенсе өлөшөндә Ирек Булатов театр һөйөүселәр алдына Илшат Йомағолов пьесаһы буйынса ҡуйылған “Мөхәббәт ҡоштары” комедияһында Хажғәле ролендә сыҡты.