Ҡурайсы, Башҡортостандың атҡаҙанған артисы Таһир Хәмитов 55 йәшен билдәләй.

 Таһир Дидар улы Хәмитов 1968 йылда Баймаҡ районының Буранбай ауылында тыуған. Бала саҡтан башҡорт халыҡ музыка ҡоралы - ҡурайҙа уйнаған. Йәштән үк ул ҡурай моңон һеңдерә, унда уйнарға өйрәнеүҙән тыш, халыҡ йырҙарын башҡара, дәртле рәүештә бейеү көйҙәрен уйнай. Шул уҡ ваҡытта ул һәр саҡ боронғо йоланы дауам итә: һәр йыр - ул көйҙәрҙә сағылыш тапҡан тарих. Йәш музыкант бындай багаж менән Өфө сәнғәт училищеһына килә һәм уны тамамлағас, ҡурай класы буйынса уҡытыусы булып ҡала. 

Таһир Дидар улы - Әстрхани ҡалаһында үткән Бөтә Рәсәй һирәк халыҡ ҡоралдарында башҡарыусылар конкурсы дипломанты, "Берҙәмлек" халыҡ-ара милли мәҙәниәттәр фестивале лауреаты, Ғата Сөләймәнов исемендәге республика конкурстары лауреаты, Ишмулла Дилмөхәмәтов дипломанты, I Бөтә донъя башҡорттары ҡоролтайына арналған ҡурайсылар, бейеүселәр һәм сәсәндәр конкурсы лауреаты, Һигеҙенсе Республика йәш башҡарыусылар конкурсы лауреаты, БР Милли халыҡ оркестрына нигеҙ һалынғандан алып солист, артист булып эшләй.