10 ноябрҙән 12-һенә тиклем Башҡортостанда «Мосафир» халыҡ-ара этник музыка форумы уҙғарылды. Өфө бөтә донъянан World Music өлкәһе эксперттарын ҡабул итте. «Мосафир» форумына Бөйөк Британия, Германия, Италия, Көньяҡ Корея һәм башҡа илдәрҙән спикерҙар , сәнғәт өлкәһе белгестәре саҡырылған.
«Мосафир» форумы «Торатау» конгресс-холы, «Өфө уттары», Music hall 27, Башҡорт дәүләт филармонияһында үтте. Программала: этник музыка буйынса белгестәр ҡатнашлығында конференциялар, продюсерҙар, тур ойоштороусылар, музыканттар өсөн оҫталыҡ дәрестәре, күргәҙмәләр һәм, әлбиттә, матур сығыштар ойошторолды. Милли музыка ҡоралдары оркестры, Роберт Юлдашев менән «Ҡурайсы», «Арғымаҡ», «Заман», «Йатаган», ZAINETDIN, Олена Уутай Подлужная, Мерема, Татьяна Калмыкова, Катя Ямщикова, Khoomei Beat, Отава Ё кеүек билдәле төркөмдәр, артистар сығыш яһаны. «Мосафир» форумы – Башҡортостанда этник музыка сәнғәтен үҫтереүгә яңы көс биреп, терәү мәғариф майҙансығына әйләнер тип көтөлә.