Владимирҙағы һабантуйҙа республика вәкилдәре беренсегә сығыш яһаны. «Башинформ» мәғлүмәт агетлығы хәбәр итеүенсә, Башҡортостандан «Сәйетбаба» ансамбле һәм Мәскәү башҡорттары ҡоролтайынан «Сәсән» коллективы байрамды биҙәне.        

«Һабантуйҙа башҡорттар беренсегә күрһәтелде – был тарихи ваҡиға булып тора. Владимир ерендә ҡурай моңо яңғыраны, башҡорт бейеүҙәре, йырҙар башҡарылды. Өлкәлә йәшәгән башҡорттар һабантуйға күпләп килде, барыһы ла рәхмәт һүҙен йәлләмәне, күҙ йәштәрен тыйманы. Байрам һуңында беҙҙең ойошма башҡорттар менән тулыланды», - тине Владимир өлкәһе башҡорттары ҡоролтайы етәксеһе Лиана Әхмәтшина.

Аҙаҡтан ул һабантуйҙы үткәрергә ярҙам иткән Бөтә донъя башҡорттары ҡоролтайына һәм БР мәҙәниәт министрлығына, Мәскәү башҡорттары ҡоролтайына, Башҡортостандың Халыҡтар дуҫлығы йортона, «Сәйетбаба» тарихи-мәҙәниәт үҙәгенә рәхмәт белдерҙе.