Мәжит Ғафури исемендәге Башҡорт драма театры 98-се ижад миҙгелен йомғаҡланы, шулай ҙа Йәйге театр миҙгеле дауам итә.
Спектаклдәр 29 июнгә тиклем дауам итәсәк. Бөгөн, 30 майҙа, Наиль Ғәйетбайҙың “Бер мәл санаторийҙа” комедияһы тәҡдим ителәсәк.
Бер мәл, ғәҙәттәгесә, махсус акция ойошторола: өлкән йәштәге, заманында төрлө өлкәлә эшләгән хеҙмәт ветерандарын, колхоз-совхоз эшсәндәрен, уҡытыусыларҙы, ҙур түрәләрҙе… санаторийҙарға ял итергә ебәрәләр. Бына улар, дәрәжәләрен белеп кенә, тәбиғәт матурлығына, зәңгәр күлгә һоҡлана-һоҡлана үҙ бүлмәләренә урынлаша, бер-береһе менән таныша. Әммә, ни ғәләмәт: беренсе көндән үк аңлашылмаусанлыҡтар башлана. Етмәһә, төрлө райондарҙан йыйылыуға ҡарамаҫтан, геройҙарҙың яҙмышы бер-береһенә бәйле, хатта бәғзеләре ҡайсандыр бер-береһен бик яҡын күргән кешеләр булып сыға. Ә был шау-шыуҙың төп сәбәпсеһе - элекке ҙур начальник - Гәрәй.
Спектакль 19.00 башлана, тамаша 2 сәғәт дауамында бара. Рәхим итегеҙ!