5-10 декабрҙә Башҡортостан Республикаһының баш ҡалаһында «Өфө. Арт. Һөнәр. Сувенирҙар» күргәҙмәһе «ВДНХ-Экспо» майҙансығында уҙа.
Экспозицияла республиканың барлыҡ райондарынан 300-ҙән ашыу оҫта ҡатнаша. Шулай уҡ Рәсәйҙең төрлө ҡалаларынан һәм күрше төбәктәрҙән алты тиҫтәгә яҡын һөнәрселәрҙе ҡаршы алыу көтөлә. Фестиваль барышында фольклор һәм бейеү коллективтары сығыш яһай, дефиле, башҡорт кухняһы дегустацияһы ойошторола.
Ҡунаҡтарға биҙәүестәр, һауыт-һаба, кейем-һалым, ҡулдан эшләнгән уйынсыҡтар һәм сувенирҙар тәҡдим ителә. Шулай уҡ, «Йыл һөнәрсеһе», «Йәш һөнәрсе», «Алтын ҡуллы оҫта», «Башҡорт шәле» конкурстары ла уҙғарыла. Сара барышында беренсе тапҡыр «Һөнәр мәктәбе» эшләйәсәк. Унда йөҙгә яҡын оҫталыҡ дәрестәре уҙғарыу күҙаллана.