Күптән түгел, 21 июндә  Башҡортостанда «Байыҡ» башҡорт бейеүе республика телевизион конкурсы уҙҙы. «Байыҡ-2018» конкурсының гала-концерты Өфөнөң «Ватан» этно-паркында уҙғарылды. Туймазы ҡалаһынан «Сәфәр» ансамбле коллективы Гран-при яуланы.

Гала-концертта еңеүселәр, финалсылар, Татарстандың, Ҡырғыҙстандың, Осетияның, Чечен Республикаһының, Әстрхандың, Мәскәүҙең иң яҡшы 37 коллективы сығыш яһаны. Иң йәш ҡатнашыусыға өс йәш ине.

Фестивалде ойоштороусылар – Башҡортостан Республикаһы Мәҙәниәт министрлығы, Өфө хакимиәте, «Башҡортостан» ТРК ДУП-һы.

Проекттың маҡсаты – башҡорт халыҡ бейеүен пропагандалау һәм һаҡлап ҡалыу, балалар араһында хореография сәнғәте ҡаҙаныштарын популярлаштырыу һәм таратыу.

Был бейеү бәйгеһе республикала художество сәнғәт үҫешенә тос өлөш индерә. Проект ярҙамында 150-нән ашыу яңы бейеү ҡуйылған. Ауыл клубтарында, мәктәптәрҙә, район балалар баҡсаларында балалар хореография ансамблдәре ойошторолған, улар, үҙ сиратында, йәш балетмейстерҙарҙың һөнәри үҫешенә булышлыҡ итә.