Май башы – яҙҙың иң көләс, нурлы, бар тирә-яҡ яңырып, ағас-үләндәр сәскәгә бөрөләнгән сихри бер мәл. Яҙғы ҡояш нуры күңелдәрҙе сикһеҙ иркәләгән ошо миҙгелдә һағышлы бер тойғо ла биләй йөрәктәрҙе – Еңеү көнө яҡынлаша, ил өсөн яуҙа башын һалған миллион ҡорбандар иҫтәлеге һәр ҡайһыбыҙҙа. Бөйөк Еңеү байрамын тап ошондай сағыу көндәрҙең береһендә билдәләй илебеҙ.

«Ил яҙмышы - ирҙәр иңендә» - 24 апрелдә Мәжит Ғафури исемендәге Башҡорт дәүләт академия драма театрының Ҙур сәхнәһендә үтәсәк Бөйөк Еңеүҙең 70 йыллығына арналған музыкаль-поэтик тамаша шулай атала. Исеменән үк күренеүенсә, кисәлә Тыуған ил азатлығы һәм тыныслыҡ, ир-егеттәребеҙҙең Ватан алдындағы бурысы, намыҫ, мөхәббәткә тоғролоҡ, киләсәк быуындар яҙмышын ҡурсалау, ил алдындағы бурыс, изге хеҙмәт һ.б. темаларға яугир-шағирҙарҙың һәм тыныс тормошта ижад иткән яҙыусыларҙың, шулай уҡ йәш замандаштарыбыҙҙың әҫәрҙәре яңғырасаҡ был кистә. Ҙур уңыш ҡаҙанған «Ҡыҙҙар моңо - моңо халҡымдың» тигән ижади проекттағы кеүек шиғырҙар сәхнәлә уйналып, бер-береһенә бәйләнеп барасаҡ, шул рәүешле кисәнең бөтөн бер образы хасил буласаҡ. Унда төрлө быуын артистары ҡатнаша һәм сығыш йыр-көйҙәр менән үрелеп барасаҡ. Проекттың авторы - Рәсәйҙең һәм Башҡортостандың халыҡ артисы Хөрмәтулла Үтәшев.

Еңеү көнөн бергәләп ҡаршылайыҡ, дуҫтар!