Башҡортостан Республикаһының атҡаҙанған артисы Илнур Әйүпов Костромала башҡорт бейеүе буйынса оҫталыҡ дәресе үткәрҙе. Ул «Губерна балет мәктәбе халыҡтарҙы берләштерә 2.0» мәҙәни-мәғариф проекты программаһы сиктәрендә уҙҙы.

Биш сәғәтлек интенсив «Башҡортостан халыҡтарының бейеү мәҙәниәтенең төп үҙенсәлектәре. Фәйзи Әҙһәм улы Ғәскәров мираҫы» темаһы буйынса барҙы. Илнур Әйүпов башҡорт халҡының мәҙәниәте, башҡорт бейеүендә сағылыш тапҡан йолалар һәм ғөрөф-ғәҙәттәр тураһында һөйләне, ҡатнашыусыларҙы башҡорт бейеүенең төп позициялары менән таныштырҙы. Һуңынан ул Фәйзи Ғәскәров исемендәге дәүләт академия халыҡ бейеүҙәре ансамбленең алтын фондындағы хореографик композицияларҙы - «Гөлнәзирә» һәм «Зарифа» бейеүҙәрен өйрәнергә тәҡдим итте.